Oiner isch dr Arsch

Liabe Grachmusikoffniks. Eier Weihnachtskonzert war mol wiader reacht schee. Aber au a bissle sentimental. Weil Ihr Zwoitausedsiebzehn uffheera wellat. Also, jetzt machats amol halblang. D'Rolling Stones spielat äwl no, dr Mick Jagger hot mit dreiasiebatzge no a Kend kriegt, dr Udo Lindenberg hot grad a nuie Platte eigschbielt (wo ibrigens sau
guat isch) ... ond Grachmusikoff will en Rente gau. Ja send ihr no ganz bacha?

Do kommet d'Leit exschdra vo Berlin Kreizberg noch Diebenga ragfahra zom Eich heera. Do wirsch drhoim tagelang mit Breedla, Xälz, Hutzelbrot ond gmischdem Broota mit Spätzla ond Kardoffelsalat gschopft. So ebbes verdreggsch jo gar nemme, wenn‘s ganz Johr en Kreizberg vegans Glomb frissch. Dia ganz bucklig Verwandschaft, des held so an Berliner Exilschwob doch bloß aus, weil er woiß, am 26schda gange zu Grachmusikoff ens Sudhaus. Ond späteschdens nocham dritta Bier ond em Drecklachablues fiehlt er sich wieder wia mit siebzehne ... so anno dreiaachzge. So!

Hend Ihr amol ebbes vo Verantwortong gheert? Oiner muass de Job halt macha. Oiner isch emmer dr Arsch. Jedenfalls, aus dera Nummer kommet er nemme raus, Ihr send die Idole vora ganza Generatio. Also. Dapfer Physiotherapie macha, s'Hergerät neu eicha, näggsch Johr am 26schda Dezember säha mr Eich wieder. Ganz gwiiß.